सबने थमा पैहले मै राष्ट्रीय पुस्तक न्यास दी पूरी टीम दा शुक्रिया करना चाहन्नी जि'ने युवाएं गी इन्ना सुनहरा अवसर दित्ता। मिगी इस प्रोजेक्ट दे बारे च इक विज्ञापन थमा पता लग्गा हा। मैं अपने युनिवर्सिटी दे अध्यापकें दे प्रोत्साहन कन्नै इसदे च भाग लैत्ता। जिसले मिगी अपना चयन होई जाने दे बारे च पता लग्गा तां बड़ी खुशी होई। इस गल्ला दा उत्साह बी हा जे एह इक ऐसा प्रोजेक्ट हा जिसदे च अस इतिहास दे इक ऐसे भाग दी खोज करने आहले हे जिसदे बारे च पैहले कोई मती पड़ताल नेई ही होई दी।
अपने देश दा नांऽ सुनदे गै मनै च बड़ी शैल अनुभूति हुंदी ऐ। भारत इक ऐसा देश ऐ जित्थे बक्खरे बक्खरे धरमें दे लोक मिली जुलियै रोहदे न।
साढ़ा भारत इक बड़ा बडडा देश ऐ। भारत दे स्वतंत्रता संग्राम दा इतिहास बड़ा लम्मा ऐ। ज्हारां लोक होए न जि'ने देश दी स्वतंत्रता दी लड़ाई च अपना जोगदान दित्ता हा। जिं'दे बिच्चां केई ऐसे न जि'नेंगी हर कोई जानदा ऐ ते ऐसे बी हैन जेहड़े इतिहास च गै दबोई मठोई गेदे न। इसदे राहें असेंगी मौका मिलेआ जे अस उ'ने स्वतंत्रता सेनानियें दे बारे च जानकारी हासल करचे जि'नेंगी मते लोक नेई जानदे। इदे जोगदान दी कोई खास सराहना नेई होई। लोक इ'नेंगी भुल्ली भलाई गे। हालांकि मैं इस गल्ला कोला बी सचेत ही जे इतिहास दा ओह् काल हून बीती चुके दा ऐ। मैं अपने कोला बनाइये किश बी नेई हा लिखी सकदी। सब किश तत्यें पर गै अधारत हा।
इस करी अस पूरी चाल्ली उ'ने स्त्रोतें पर गै निर्भर हा जेहड़े कुतै ना कुतै उपलब्ध ते हे पर इक थाहरे नेई। उ'नेंगी तुप्पना बी इक दिलचस्प कम्म हा। केई बारी ते बड़े घट्ट् स्त्रोत उपलब्ध हे जां फ्ही ऐ गै नेई हे। हून इ'ने स्त्रोतें गी तुप्पिये इक थाहरें कठेरने दा कम्म करना हा तां जे हर जानकारी कठेरी जाई सकै ते इक पूरा दस्तावेज त्यार कीता जाई सकै। इक अधार बनी सकै जिसदे पर अग्गे चलिये बी कम्म कीता जाई सके।
इस प्रोजेक्ट दा मिगी अपने पास्से आकर्षित करने दा इक कारण होर बी हा। इस सच्चाई कोला अस सारे गै वाकफ हां जे अस भारतवासी अपने इतिहास गी संजोइयै रक्खने च इन्ने कामजाब नेई रेह जिन्ना होना चाहिदा हा। तथ्ये ते प्रमाणिकता पर अघारत दस्तावेज बी बड़े घटट् दिखने गी लबदे न। हालांकि इसदे केई कारण होई सकदे न। साढ़े इतिहास दा इक महत्वपूर्ण भाग समे दी धूडा हेठ दबोई गेदा ऐ। एह इक ऐसा अवसर हा जिसदे च सारा कम्म तथ्ये ते सच्चाई पर अधारत हा। जिसदी पूरी जांच कीती जानी ही ते दस्तावेज त्यार कीते जाने हे। मेरे पास्से दा बी इतिहास गी सरंक्षित करिये च एह इक निक्का जेहा जोगदान होई सकदा ऐ। इस करी मिगी एह प्रोजेक्ट बड़ा गै आकर्षक ते महत्वपूर्ण लग्गेआ। अज्ज जिसलै अस अजादी दा फल भोगा करने आं। अस एह भुल्ली जन्ने आं जे उसले हलात किश होर हे जदुं साढ़े पर अंग्रेजें दा राज हा। उसले साढ़ियें अपनियें इच्छाएं दा कोई महत्व नेई हा। असें अपनी मौलिकता ते अपनी पनछान कुते गोआई दित्ती दी ही, पर उसले किश लोक ऐसे बी हे जि'नें अपने अस्तित्व आस्तै विद्रोह करने दा सोचेआ। उ'ने पुटठियें परिस्थितियें च बी शासकें दे खलाफ विद्रोह कीता। इ'नें वीरें ते वीरांगनाएं दे बारे च पढ़ना बड़ा गै प्रेरणादायक रेहा ऐ। किस चाल्ली दे लोक होने ओह जि'नें इन्नी वीरता दस्सी ते शासकें दा विरोध करी सके। इसनै मिगी बड़ा प्रेरत कीता। इतिहास दा खेतर बड़ा गै विशाल ऐ। विद्रोह दे बीऽ बक्खरे बक्खरे थाहरें पर बक्खरे बक्खरे समे पर पनपे हे। सबने थमा दिलचस्प कम्म हा उ'ने लोकें दी पनछान करनी जि'नें वास्तविक रूप च देश दी स्वतंत्रता च जोगदान दित्ता हा। देश आस्तै बलिदान दित्ता हा। जि'नेंगी मते लोक जानदे बी नेई। जिसले मैं इदे बारे च खोज करनी शुरू कीती सबनें थमा पैहले इक सूची बनाई। जिसले पढ़ना शुरू कीता तां मसूस होआ जे एह ओह् लोक न जिंदे बारे च हर भारतवासी गी पता होना चाहिदा। मिगी एह दिक्खिये हरानगी लग्गी जे इन्ने सारे लोकें बिच्चां मतियां जनानियां हियां। ओह् जनानियां जेहड़ियां बड़े गै आम परोआर कन्नै सरबंध रखदियां हियां। एह इक बड़ी गै प्रेरणादायक गल्ल ही जे किश बडडा करने आस्तै कुसे उच्चे कुल च पैदा होने दी जां कुसे राजे महाराजे दी संतान होना जरूरी नेई हुंदा। इक आम माहनू होंद होई बी किश बी कीता जाई सकदा ऐ। बस लोड़ होंदी इक संकल्प दी। एह कताब छड़ी तथ्ये पर गै अधारत नेई बल्कि पाठकें गी प्रेरत बी करदी ऐ।
सबनें थमा पैहला पाठ सेनापति बापट हुँदे पर अधारत ऐ। सेनापति बापट बड़े गै बहादर हे। उ'नें बम्ब कोशल सिक्खेआ हा ते फही भारत आईये नोजवानें गी बी सखाया तां जे अंग्रेजें दा मकाबला कीता जाई सकै। सफाई अभियान दी शुरूआत बी इं'दे थमा गै होई ही। सेनापति बापट होरें अपने परोआर कोला बद्ध महत्व अपने देश गी दित्ता ते अपने देश गी अजाद कराने आस्तै हर मुमकिन कोशश कीती। इंदी व्हादरी गी कदे बी भलाया नेई जाई सकदा ।
बेगम हजरत महल हुंदी वीरता दा जिन्ना जिकर कीता जा घटट् गै होग। बेगम हजरत महल इक नर्तकी हियां ते इक बड़े गै आम परोआर कन्नै सरबंध रखदियां हियां। उ'ने ना छड़ी अपनी कला दे बलबूते पर पनछान बनाई पर जिसले स्हेई समे आया ता हथियार बी चुक्के ते उस समे दे शासकें दा बरोध बी कीता। उं'दी वीरता एह सोचने पर मजबूर करी दिंदी ऐ जे इक आम जेही नर्तकी इन्नी व्हादर कियां होई सकदी ऐ। बेगम हजरत महल जनानियें आस्तै वी इक मसाल पेश करदियां न। उ'दी इये विशेषता मिगी उं'दे पास्से आकर्षित करदी ऐ।
Send as free online greeting card
Email a Friend
Visual Search
Manage Wishlist